Беларускае аб'яднанне ў Швейцарыі Rotating Header Image

Трэба часцей сустракацца

4 лютага вось ужо трэці раз ў Швейцарыі, а ў Цюрыху — другі, адбыўся канцэрт адной з самых яркіх зорак беларускай сучаснасці — Лявона Вольскага.

Лявон — выдатны музыка, пісьменнік, мастак і паэт, заснавальнік гуртоў «Мроя» і «NRM», лідар самага вясёлага беларускага гурта «Крамбамбуля» і проста харошы чалавек з вельмі добрай энэргетыкай. Той, хто быў на канцэртах Лявона, не мог не адчуць тую цёплую і сяброўскую атмасферу, якую выканаўца ўмее стварыць. Нават пры аудыторыі ў тысячу чалавек. Можна тады сабе ўявіць, што за атмасфера пануе на беларускім канцэрце за мяжой, дзе слухачы — людзі не выпадковыя, а тыя, што выраслі на гэтых песнях! Не, гэта быў нават не канцэрт, хутчэй кватэрнік ці сяброўская сустрэча (з якасным гукам і вядомым госцем).

Кожны раз здзіўляе тое, які шырокі дыяпазон голаса і рэпертуара ў сп. Вольскага. Ён можа быць саркастычным і лірычным, жорстка рокавым і кранальна мілагучным. Праграма выступу ў Цюрыху як раз была пабудавана такім чынам, каб аўдыторыя магла адчуць і пачуць гэтую разнастайнасць. Прагучалі песні з «Народнага альбому», праекту «Снежны завулак», апошняга альбому «Псіхасаматыка», некаторыя хіты гурта «Крамбамбуля» і інш.

Выступ быў вельмі інтэрактыўны. Слухачы не толькі падпявалі з месцаў, але і выходзілі для бэк-вакалу на сцэну: дзяўчаты для выканання песні «Казік», хлопцы — песні «Марскі чалавек». А пад час вечных песень «Паветраны шар» і «Тры чарапахі» таньчыла ужо ўся заля.

Развітваліся добра і цёпла. «Цюрых — гэта месца, дзе вельмі прыгожа спяваюць дзяўчаты, а хлопцы спяваюць не горш за іх. Трэба часцей сустракацца!» — выразіў надосталь агульную думку Лявон.

Каментыраваць

Ваш адрэс электроннай пошты не будзе апублікован. Паля, абавязковыя для запаўнення, адзначаны зорачкай.

This site uses Akismet to reduce spam. Learn how your comment data is processed.

  • Беларуская мова
  • Русский
  • Deutsch